Yan panel bloqu
Yazı Tarixi
April,
12
2023
XIX əsrdə icad edilən elektrik lampası hazırda məkanların işıqlandırılması üçün təməl ehtiyaclardan birinə çevrilib. O elektrik enerjisini işığa çevrimək üçün nəzərdə tutulmuş cihazların əsas elementidir. Elm və texnologiyanın inkişafı ilə əlaqədar olaraq hazırda müxtəlif növdə və çeşiddə lampa var. Bu yazımızda ən çox istifadə edilən bir neçə lampa növü və onların xüsusiyyətləri haqqında məlumatları sizinlə paylaşacağıq.
Közərmə (akkor) lampaları: geniş yayılıb və qiyməti digər lampa çeşidləri ilə müqayisədə daha ucuzdur. İstilik yaradan bir filament (volfram, 3000 dərəcə selsidə əriyən) vasitəsilə elektrik cərəyanı keçirərək işləyir. Közərmə zamanı filament qırmızı dəmir kimi parlayan işıq saçır. Filamentin temperaturu nə qədər yüksəkdirsə, işıq da bir o qədər parlaq olur. Közərmə lampaları işıqlandırma zamanı ətrafa istilik yayır. İşıq səmərəliliyi hər vatta görə 15 lümendir.
Halogen lampalar: közərmə (akkor) lampalarının bir növüdür. Közərmə (akkor) lampalarından fərqli olaraq onun içərisində halogen qazı var. Ağ işıq yayır, daha dayanıqlıdır. İşıq səmərəliliyi hər vatta görə 25 lümendir.
Floresan lampalar: düz, əsasən maviyə çalan soyuq işıq yayır. Göz qamaşdırmır, işlək vəziyyətdə olarkən istilik yaymır, uzunömürlüdür. İşıq səmərəliliyi hər vatta görə 45-100 lümendir.
LED lampalar: yeni nəsil lampalardır. Onlara işıq yayan diodlar da deyilir. Fotonlar şəklində enerji yayan və elektriki birbaşa işığa çevirən bərk cisimli yarımkeçirici cihazdır. Enerjiyə qənaət edir. Uzunömürlüdür. Fərqli dizaynda çeşidləri var. İşıqlandırma cihazlarında şux görüntünü təmin edir.
İşıqlı evlərdə yaşayasınız!
