Yan panel bloqu
Yazı Tarixi
May,
24
2024
Boyama işi zamanı boya rənginin məkana uyğun olmasına xüsusi diqqət yetirilməlidir. Rənglərin insan psixologiyası üzərində təsiri böyükdür. Düzgün rəng seçimi ilə məkanlarda geniş, yüksək enerjili aura yaratmaq mümkündür. Bu səbəbdən yaşamaqdan zövq alacağınız yaşayış sahələrini dizayn edərkən ərazinin coğrafi baxımdan hansı istiqamətdə yerləşdiyi və gün işığından necə faydalandığı nəzərə alınmalıdır. Otaqlar müxtəlif vaxtlarda gün işığı alırsa, boya rəngini də buna uyğun tənzimləmək məsləhətlidir.
Səhər günəşinin təsirini mavi və yaşılın çalarları ilə tənzimlə
Bəzən evin bəzi otaqları və ya guşələri səhər saatlarında bol günəş işığı alır. Boyama işi zamanı bu faktı nəzərə alaraq rəng seçmək lazımdır. Belə otaqlarda yaşıl, mavi rəngin çalarlarından istifadə işığın təsirini balanslaşdırmaqla yanaşı rahatlıq hissi bəxş edəcək.
Gün boyu günəş işığı düşən məkanlar üçün boya rəngi
Əgər gün ərzində bol günəş işığı düşən bir evdə yaşayırsınızsa, sarı, qızılı, narıncı və ya qırmızı rənglərin parlaq çalarlarında boya istifadə etmək olmaz. Çünki bu rənglər istilik hissi yaradır. Bu cür məkanlarda günəşin qızılı rəngini tarazlaşdıracaq və sərin atmosfer yaradacaq soyuq rənglərin istifadəsi məqsədəuyğundur.
Axşamüstü günəş işığı düşən məkanlar üçün boya rəngi
Axşamüstü günəş işığı alan məkanlar səhər saatları ilə müqayisədə daha solğun görünür. Belə otaqlarda sarı və qızılı rəng çalarları daha effektivdir. Axşam günəşinin təbii kölgəsi sayəsində bu cür rənglərin parıltısı ilə sakitlik və dinclik hissi yansıdan bir mühitdə olmaqdan zövq ala bilərsiniz.
