Yan panel bloqu
Yazı Tarixi
July,
04
2022
Boyama işində nəticənin ürəkaçan olması üçün boya ilə yanaşı, alətlərin də təyinata uyğun seçilməsi vacibdir. Rəngləmə işi fırça ilə ediləcəksə, aşağıdakı məqamlara diqqət yetirmək tövsiyə olunur.
• Boyanın tərkibi nəzərə alınmalı;
• Fırça ölçüsü boyayacağınız səthə uyğun seçilməli;
• Fırçanın növü tətbiq sahəsinə görə təyin olunmalı;
Su əsaslı boyalar sintetik tüklü fırçalarla tətbiq olunmalıdır. Sintetik tüklər suyu hopdurmur, boyanın fırça üzərində axıcılığını təmin edir. Səth üzərində fırça izləri yaratmır. Təbii tüklü fırçalarla müqayisədə daha dayanıqlı və təmizlənməsi asandır. Solvent (tiner ilə incəldilən) əsaslı boyaları isə həm sintetik, həm də təbii tüklü fırçalarla çəkmək olar. Əgər solvent əsaslı boya ilə mat bir səth istəyirsinizsə, təbii tüklü fırça seçməniz məsləhətdir.
Fırça ölçüləri boyanacaq sahəyə uyğun olmalıdır. Qapı, mətbəx dolabları kimi düz, geniş səthləri boyamaq üçün 7 sm-dən böyük fırçalar idealdır. Süpürgəlik, pəncərə, qapı çərçivələri, müxtəlif əşyalar üçün isə 1.5 - 3 sm aralığında kiçik fırçalar məsləhət görülür. Dairə şəkilli fırçalar dar hissələri asan boyamanıza kömək edəcək. Kəsdirmə hissələrin tam və rahat boyanması üçün bir tərəfi digərindən uzun olan fırça seçilməlidir.
