Plastik borularda montaj işləri

Təmir işlərində ən vacib mərhələlərdən biri su, kanalizasiya və istilik sistemlərinin döşənməsi mərhələsidir. Bunun üçün birinci növbədə PPRC, PVC boruları və fitinqləri haqqında ətraflı məlumata sahib olmalısınız.

Montaj işi zamanı boruların ölçü və qalınlığından aslı olaraq müxtəlif növ qayçılardan istifadə edilir. Plastik borularda kəsim işlərinin düzgün alınması üçün metal xətkeşlə ölçü alındıqdan sonra, rəngli karandaşla kəsiləcək yeri işarələyirik. Boru işarələnmiş yerdən, qayçını sürüşdürmədən kəsilməlidir. Qayçını həddən artıq sıxmaq qayçı yayının qırılmasına səbəb ola bilər. Kəsmə prosesi zamanı qayçı düzgün tutulmalıdır.

Plastik boruları birləşdirmək üçün qaynaq aparatı (ütü) istifadə edilir. Qaynaq aparatı elektrik enerjisini istilik enerjisinə çevirərək istilik əmələ gətirir. Səyyar ayaqlar üzərinə qoyularaq işə salınır. Boru və fitinqləri qaynaq etmək üçün müxtəlif ölçülərdə ucluqlar mövcuddur. Boru və fitinqlərin ölçüsünə uyğun olaraq ucluqlar seçilir. Bu ucluqlar vintlər vasitəsi ilə aparata bərkidilir. Qaynaq aləti termostat 260 - 270 dərəcəyə qoyulur. Soyuq və küləkli havada isə 280 dərəcəyə qoyulmalıdır. Alət üzərindəki lampanın sönməsini gözləyin.Termostatın işləyib-işləmədiyindən əmin olun. Sonra borunu lazım olan uzunluqda kəsin. Boru və fitinq ağızlarının təmizliyinə diqqət edin. Alüminum falqa boru istifadə edirsizsə, boru falqa soyan alətlə alüminum təbəqəni götürün. Borunun birləşən ucu ilə fitinqin ucunu uyğun ucluqlara taxıb qızdırın. Qızdırma işi bitdikdən sonra boru və fitinqi ucluqlardan çıxardıb bir- birinə keçirin. Birləşdirmə 1 - 1,5 saniyə ərzində son vəziyyətini almalıdır. Bu vəziyyətdə kiçik ölçülü borular 10 saniyə sıxılaraq sabit vəziyyətdə saxlanmalıdır. Böyük borular üçün müddət 30 - 40 saniyə olmalıdır. 

Montaj zamanı bunu etməyin

Sıxma zamanı borunu fırlatmaq olmaz. Birləşmə bitdikdən sonra qətiyyən qaynaq olunmuş səthə güc tətbiq etməyin, yoxsa uğursuz bir qaynaq əldə etmiş olarsız. Önəmli məqamlardan biri də qaynaq alətində borunun nə az, nə də çox sıxılmamasıdır. Hər iki halda birləşmə xətalı olacaqdır.