Kombi və növləri
Kombi evlərdə həm istilik, həm də isti su təminatı üçün quraşdırılan cihazdır. Kombi sözü ingilis dilindəki “combined”, yəni “birləşmiş” sözündən götürülüb. Az yer tutan, səssiz, yüngül çəkili, asan daşına bilən bu cihaz yay və qış rejimində işləyə bilir. Yay rejimində kombi ancaq suyu isidir. Qış rejimində isə suyu isitməklə yanaşı, qızdırılmış suyu radiatora ötürərək istilik vermə funksiyasını yerinə yetirir. Kombi elektron plata, nasos, üç yollu ventil, odluq (farsunka), istilik dəyişdirici, fan, genişləmə çəni, idarəetmə hissələri, istilik sensorları, baca sensoru və digər məcburi sistem və təhlükəsizlik detallarından ibarətdir.
Mənzillərdə istilik və isti su təminatını qarşılamaq üçün kombi sisteminin bütün hissələrini tələblərə uyğun yığmaq, bütün otaqları əhatə edən su borularını çəkmək və cihaza qoşmaq kifayətdir. Təbii qaz və su xətləri birləşdiriləndən sonra kombi elektron idarəetmə sistemi vasitəsilə suyu tələb olunan dərəcəyə qədər qızdırır və sistemə vurur. Kombinin quraşdırılmasında HILL FAN kombi setindən, isti su xətti üçün HILL FAN kompozit borularından, soyuq su xəttinin birləşdirilməsi üçün isə HILL FAN sadə su borularının müvafiq olanından istifadə edə bilərsiz.
Diqqət! PPR borulardan istifadəyə icazə verilmir.
Kombiyə 4 su boru xətti və 1 qaz xətti birləşir: Radiatorlara, istilik sisteminə, gediş və qayıdış (20-lik metal çıxış), həmçinin isti suyun çıxışı və soyuq suyun daxil olduğu (15-lik metal) xətlər. Cihazdan çıxış borularının diametri evin sahəsinə görə dəyişir. Normalda bu xətlər 32 mm və ya 25 mm HILL FAN kompozit boru olur. Lakin boru diametri getdikcə daha kiçik diametrlə əvəzlənir. Radiatorların hər birinə və sonuncu radiator xəttinə 20 mm boru çəkilir.
Kombi seçərkən evin sahəsi, cihazın gücü, növü nəzərə alınmalı, zəmanət müddətinə, sertifikatının olub-olmamasına diqqət yetirilməlidir. Zəmanət müddəti adətən istehsalçı tərəfindən müəyyənləşdirilir. Lakin belə müddət yoxdursa, qanunvericiliyə görə o ən azı 2 il zəmanətli sayılır. Kombilərin 16,18, 22, 24, 28,32,35, 36,40, 50, 55 və 60 kw gücdə olanları geniş yayılmışdır. 24 kw-lıq kombi təxminən 120 m², 28 kw -160 m² və 35 kw- 220 m²-ə qədər sahəni qızdırmaq gücünə malikdir.
KOMBİ NÖVLƏRİ
Baca, yanma və ya isitmə texnologiyasına görə fərqli kombi çeşidləri var.
*Baca növünə görə (yandırılan qazın atmosferə necə atılmasına görə) kombi bacalı və hermetik (hava keçirməz) olmaqla iki yerə bölünür. Bacalı kombi - yanma əsasında lazım olan oksigeni alır və yanma sonunda lazımsız qazları uyğun baca vasitəsilə xaric edir. Bu halda bacaların standartlara uyğunluğu çox önəmlidir. Hermetik kombi - yanma üçün istifadə olunan havanı ventilyator vasitəsilə xarici mühitdən alır və yanma sonrası ortaya çıxan tullantı qazı eyni sistemlə çölə atır. Bu halda otağın havasını dəyişməyə ehtiyac qalmır. Çünki yanma zamanı otağın havasından istifadə olunmur.
*Yanma və ya isitmə texnologiyasına görə də 2 kombi çeşidi var.
- Ənənəvi (konvansional) kombi
- Kompressor-kondensatorlu kombi
Ənənəvi (konvansional) kombi özü də tək istilik dəyişdiricili (esenjorlu) və cüt istilik dəyişdiricili (esenjorlu) olmaqla 2 yerə bölünür.
Tək istilik dəyişdiricili kombi adından bəlli olduğu kimi bir ədəd istilik dəyişdiriciyə sahibdir. Mərkəzi istilik (radiator) və məişət suyu xəttinin qızdırılması üçün istilik dəyişdirici tək bir quruluşda birləşdirilmişdir. Bu cür kombilərin bir başqa xüsusiyyəti də dövriyyə nasosunun daxili su rejimində işləməməsidir. Məişət suyu birbaşa qızdırılmış istilik dəyişdiricidən (esenjordan) keçdiyindən istilik üçün nasos tələb etmir. Bu, istilik suyunun (radiator) istifadəsi zamanı elektrik istehlakında azalma və dövriyyə nasosunun ömrünün artmasına səbəb olur. Cüt istilik dəyişdiricili kombilərlə müqayisədə məişət suyu başlanğıc istimə sürəti yüksəkdir.
Cüt istilik dəyişdiricili kombilərdə mərkəzi istilik (radiator) və məişət xəttinə gedən isti su sistemi ayrıdır. Bu kombilər əsas və əlavə istilik dəyişdiriciyə malikdir. Əsas istilik dəyişdirici kirəc tutmaması və istiliyin səmərəli ötürməsi üçün misdən hazırlanır. Alov istiləşməsi burada aparılır. Əlavə istilik dəyişdirici isə paslanmayan poladdan düzəldilir. Bu istilik dəyişdiricisi qazanın alt hissəsində, arxasında yerləşir. Burada məişət suyu qızdırılır. Alovla əlaqə yoxdur. Əsas istilik dəyişdiricisində qızdırılan su üçtərəfli motorlu klapan istiqamətində bu istilik dəyişdiricisindən keçir. Dəyişdiricidəki lövhələr həmin su ilə qızdırıldıqda, buradan keçən məişət su xəttindəki su da isinir. Cüt istilik dəyişdiricili kombilərdə mərkəzi istilik (radiator) və məişət xəttinə gedən isti su ayrı kanallardan keçir və bir-birinə qarışmır.
Kompressor-kondensatorlu kombilər təbii qaz yandırdığı zaman böyük miqdarda su buxarı əmələ gətirir. Bu növ kombilər yaranmış buxarın enerjisini hərəkət etdirir və enerji qazandıqdan sonra kondensator buxarını kənara atır. Adi kombilərdə istifadə olunan istilik 80-90 faiz təşkil edirsə, kompressor-kondensatorlu kombilərdə bu 105 -109 faizdir.
