Elektrik naqilləri və kabelləri

Elektrik quraşdırma işlərinə başlamazdan əvvəl işlədiləcək elektrik materialları haqqında müəyyən məlumatlara malik olmaq çox vacıbdir. Yaşayış binalarının demək olar ki, hamısında mənzillərə bir fazalı şəbəkə gərginliyi (220 V) verilir. Bu o deməkdir ki, mənzillərə verilən gərginlik xətlərinin elektrik parametrləri müəyyən hədd daxilindədir, yəni məhduddur.

Mənzillərdə istifadə edilən elekrik naqilləri

Mənzillərin elektrik quraşdırma işlərində ən çox istifadə edilən naqillərin en kəsiyi “1,5 mm²”, “2,5 mm²” , “4 mm ²” və “6 mm²” ölçüləri daxilindədir. Mis içlikli məftillərdən daha çox istifadə edilir. Məftillər təkdamarlı və çoxdamarlı ola bilərlər. Kabellər özündə bir neçə məftili birləşdirərək bir qədər mürəkkəb konstruksiyaya malikdirlər. Kabellərdən daha çox əlahiddə yerləşən elektrotexniki qurğu və avadanlıqlara gərginlik xətlərinin verilməsində, həmçinin mənzillərin elektrik quraşdırma işlərində istifadə edilir.  

Elektrik kabelləri

Kabellərin daxilindəki məftillərin də təkdamarlı və çoxdamarlı növləri var. Çoxdamarlı mis məftillər müxtəlif rənglərdə istehsal edilir. Satışa spiralvari dolamaqla polietilen örtüklərdə bağlama şəkilində çıxarılır. Mis damarlı məftil və kabellərin izolyasiya örtükləri əsasən polivinilxlorid tərkibli plastik materialdan hazırlanır ( Rusiya istehsalı olan məftillərdə ПВХ, Avropa istehsalı olan məftillərdə PVC kimi işarələnir). Mənzillərdə elektrik quraşdırma işlərində iki və üç mis damarlı məftillərə malik olan kabellərdən də istifadə edilir. Bu kabellər də bağlama şəkilində satışa çıxarılır.  Kabelin uzunluğu 100 m olmalıdır. Hər bir kabelin üzərində onu istehsal edən şirkətin adı, buraxılış tarixi, uzunluğu, tərkibindəki məftillərin miqdarı və onların en kəsiklərinin sahəsi göstərilmişdir. Bu məlumatlar kabelin üzərində hər bir metrdən bir təkrarlanır.

Elektrik quraşdırma işlərində ən vacib məsələlərdən biri hər bir məftili öz təyinatına uyğun istifadə etməkdir. Məftillərin təyinatına uyğun olmayan şəkildə istismarı, ciddi fəsadlara yol aça bilər. Onlar en kəsiklərinə uyğun olaraq müəyyən elektrik gücünə malik olurlar. Məftilin en kəsiyi artdıqca ondan axan cərəyanın miqdarı də artır və bu da öz növbəsində ona yüklənən elektrik gücünün artmasına səbəb olur.